السلام عليكم ورحمة الله وبركاته
محاوره بين شاعرين مبدعين وهم
شاعرنا والمشرف العام / عايض العاطفي
والشاعر / عبدالله الراجحي
الراجحي
سلام مني يابني عاطف عموم = من شاف لي عايض يعجل يزهمه
شاعر وامثل لابتي سمو البقوم = قوم السطر واهل الفخر والمكرمه
العاطفي
يامرحبا وان كان في صدرك علوم=اليـل بـادي والسوالـف مبهمـه
ان عال عايل يبشر ابفرك الخشوم=والي جهل فـي سلمنـا بنعلمـه
الراجحي
معكم لنا صولات في روس الرجوم=والجيد اللي رزّ بالطيب علمه
لكنّ من ياقف ورى قلب الرقوم=خبري بكم مانتم هلٍ للمظلمه
العاطفي
يابين نجم الجدي من بين النجوم=عندك شكاوي روح يم المحكمـه
ما يجحد اهل الطيب ياكود الرخوم=يالطالب الي مـا يطيـع امعلمـه
الراجحي
انا يدي طالت ولي صلب العزوم=ولا جيت ادور للعوض والمرحمه
شايب وله خمسة مداغيشٍ قروم=بدّا الصغير واكبر الذر حرمه
العاطفي
انته مع الطرقه مذلل ومهزوم=الله جعلكم وسط وديان الرمـه
اطلب من الله ربنا ربن رحوم=ولا انت في دربك تجيك املغمه
الراجحي
ياعايض اركد لاتجي رجلِ ظلوم=فرّق مابين اسم القلم والمرسمه
ولا عليك بربعك تسد اللزوم=وتبين اللي عاجزٍ تستفهمه
العاطفي
كم واحد(ن) لا طاح ما يقدر يقوم= يالشاعر الي راح مافي محزمـه
ضرفك بعد جانا مختم بالختـوم =ما ينفعك مـن فاليالـي تزهمـه
الراجحي
ارسلك يم سدير وتروح الجموم=هاوي غزو والذيب يدرع بغنمه
ابريت سهمي واعتلى كل السهوم=اما اكسره ولا على الحيل اعزمه
العاطفي
الطير في جوك على راسـك يحـوم=اعطيك علم(ن) مير تعجـز تفهمـه
اخاطـب ابنيـه و نياتـك تهـوم=سهمي يوقع فيك في عرض لحمه
الراجحي
مانته بشارب لكن القلب محموم=والسر في لحم المدير وفي دمه
ابحث عن الشايب وتقسيم القسوم=هذاك سهمي يوم كلٍ بسهمه
العاطفي
اتعبت نفسك بعد غرتك الحلوم=خذ صفعتن مني بدون مقدمه
الشايب الي حط في قلبك هموم=اخر حياتك عند بابه تخدمه
الراجحي
اللي على الضيفان ماساق السلوم=ياجب على قحطان تقف وتعدمه
شفي وجود بداح .. وبداح معلوم=ولا ابو شوشه ذا يعود لبهمه
العاطفي
ليتك بوسط البيت وتصلي تصوم=صف البقوم الي طلع منه رخمه
الوقت قاسي بين معطى ومحروم=ولا سفير الهنـد هـذا بكتمـه
الراجحي
جمهورنا غالي مقدر ومحشـوم=واشوف انا الرديان قامت تزحمه
اهل تربة ماتلتفت لادنى الرسوم=كرمكم الله والوعد فالقادمه
العاطفي
صفي سوات طويق في بيض الحزوم=ياعزتي للي سواتك ندحمه
مابه عوض لو دار يوم(ن) بعد يوم=من بعد فيصل يالله انك ترحمه
موضوع: محاوره بين الشاعرين .. عايض العاطفي و عبدالله الراجحي 
الأحد أغسطس 29, 2010 1:49 pm
