عـبــدالله بـــن شــايــق
كل ما شفت الرياحـي قمـت افكـر
غير مدري وش انـا كنـت متذكـر
من يصدق غلطـة الوقـت المبكـر
والحقيقـه مانـقـول إلا الحقيـقـه
يالرياحي صباح الخير مدري مسـاه
يمكن اتجيـك غلطـه مـا تحملتهـا
وانت عاقل ولا تحتاج منـي وصـاه
صـدرو حجتـك لاشـك وردتـهـا
فـيــصــل الــريــاحــي
ياحليلـك ياحليلـك يابـن شـايـق
خلنا نلعـب علـى المعنـى دقايـق
والسوالـف رايقـه والجـو رايـق
والحقيقـه مانـقـول إلا الحقيـقـه
يامساء العود الازرق يوم ذعذع شذاه
نسمح الاولـه وافطـن ليـا عدتهـا
صف يقرب من المنبر وصفـن وراه
لا تسولـف عـلـومٍ ماتوكدتـهـا
عـبــدالله بـــن شــايــق
في بـلاد الغـرب ياكبـر الكـوارث
في بلاد الشـرق ياكثـر الحـوادث
والبقـوم بقـوم والحـرث حـوارث
والحقيقـه مانـقـول إلا الحقيـقـه
من وقع في الخطر يطلب سبيل النجاه
اما انـا نعمـت الوالـي تحمدتهـا
الجدي في شماله والقمر في سمـاه
لابـسـوك الكرفـتـه وكرفتـهـا
فـيــصــل الــريــاحــي
مـن يقـول الاولـه مثـل الاخيـره
عامـل مصنـع دهانـات الجزيـره
وابن شايق كـل ماجيـت استشيـره
والحقيقـه مانـقـول إلا الحقيـقـه
دارت السالفه والحـب دارت رحـاه
تحت نور القمـر كـم ليلتـن بتهـا
لا لمسنا يدا المسكين طاحت عصـاه
اخبـرك بالقضيـه عقـب ثبتـهـا
عـبــدالله بـــن شــايــق
احمـدالله واشكـره مرتـاح دايــم
اتخيـر بالنظـر والـحـظ قـايـم
فالـدروب وفالرجـال وفالعـزايـم
والحقيقـه مانـقـول إلا الحقيـقـه
يجهل الليل الابيض واحدن ما سـراه
وانـت يمنـاك بفراشـك توسدتهـا
واعنا للـي يـدور للعنـا واعنـاه
والحبايـب نهـار العيـد عايدتهـا
فـيــصــل الــريــاحــي
ادري انك ماعليك خـلاف انـا ادري
مير ما تدري عن اللي حس صـدري
جالسـن مرتـاح والايـام تجـري
والحقيقـه مانـقـول إلا الحقيـقـه
انت جالس على كيفك تشاهـد قنـاه
جلست الباديه نعمـه ليـا صدتهـا
انت ضيفن ولو يعزم ما يحضر عشاه
كـل ماشبـت النيـره تباعدتـهـا
عـبــدالله بـــن شــايــق
ليش ماعدلتهـا يـوم انـت قـادر
وانت تمشي بينهـم سانـد وحـادر
عزتي للشيخ من بعـض المصـادر
والحقيقـه مانـقـول إلا الحقيـقـه
والله انك كفو للقوم مثـل الحصـاه
لكـن السيـده جـات وتسيدتـهـا
الرياحي ليا حصل خبـر مـا نسـاه
والمطيـه بقيـد الفـكـر قيدتـهـا
فـيــصــل الــريــاحــي
مـن جديـد وكـب شـيٍ راح كبـه
حرك المكـره علـى لحـن المحبـه
واحضـر البـن المقنـد ثـم صبـه
والحقيقـه مانـقـول إلا الحقيـقـه
كم عطيتك علومـن تحـدد الاتجـاه
شلتهـا فالفريـزر ثـم جمدتـهـا
بين يوم الممات وبين يـوم الحيـاه
ودنـا ننذكـر الموتـه ليـا متهـا
عـبــدالله بـــن شــايــق
طيـب اسمعنـي وسمعنـي كلامـك
مرحبابـك بعـد ماجانـي سلامـك
العهـد قريـب عــزالله مقـامـك
والحقيقـه مانـقـول إلا الحقيـقـه
قد عطيتك علومـن تلفـت الانتبـاه
يشهـد الله وكـل الخلـق شهدتهـا
من بيوت الفقـر ولا بيـوت الغنـاه
عنـدك اربعميـة وسـرا ماكبتهـا
فـيــصــل الــريــاحــي
الشجاعـه ليـه سموهـا شجاعـه
والقناعـه ليـه سموهـا القناعـه
والوداعـه ليـه سموهـا الوداعـه
والحقيقـه مانـقـول إلا الحقيـقـه
انت تنظـر لوجـه العلـم ولا قفـاه
الوحن تخطـي الكـوره ليـا شتهـا
ابن شايق مامشى في علمه اللي بداه
والمتاعـب علـى شانـه تكبدتهـا
عـبــدالله بـــن شــايــق
ابك انا من خلقتـي مـالان باسـي
شاعر وقلبي على القاسيـن قاسـي
ما انتفض قلبـي ولا نزلـت راسـي
والحقيقـه مانـقـول إلا الحقيـقـه
انت منته علينا من فروض الصـلاه
روسنا قاسيـه وان كـان عاندتهـا
اكثر الناس مالـه مايجيلـه زكـاه
ودي اهـددك مـع نـاس هددتهـا
فـيــصــل الــريــاحــي
يابـن شايـق لاتـحـدا لاتـحـدا
المدافـع زاهبـه وانــت المـبـدا
لاتعـدا عــن حــدودك لاتـعـدا
والحقيقـه مانـقـول إلا الحقيـقـه
مات الابرق وتبراك احسن الله عزاه
منت الاول وكم من صيـده صدتهـا
العمايـر ماتصلـح للحفـاه العـراه
كيـف تلقـى علومـك لاتفقدتـهـا
عـبــدالله بـــن شــايــق
منهو اللي حط فـي الدنيـا مقالـب
لربعيـن مـدرس وتسعيـن طالـب
والمخادع والحيـل طبـع الثعالـب
والحقيقـه مانـقـول إلا الحقيـقـه
منت تعدا على تبـراك جعلـه فـداه
اليهود انزحـت والـروس شردتهـا
ابن شايق بـداره رافعـن مستـواه
وانت عندك ثـلاث جنود جندتها
فـيــصــل الــريــاحــي
انا ابن منصـور مانـي بالحصينـي
لاتثـور القنبلـه بيـنـك وبيـنـي
وانت شعره من هدب جفني وعينـي
والحقيقـه مانـقـول إلا الحقيـقـه
انت قدرن ليا غش ورفعنـا غطـاه
قـام يصـلاه نـار ومويتـه كتهـا
ابرق الريش جاني دونه ابرق عبـاه
والمصايـب علـى شانـك تهبدتهـا
عـبــدالله بـــن شــايــق
المـثـل يـقـول والله ماحكـوبـي
غير ناسٍ عاجزيـنٍ عـن دروبـي
والحسد يقضي على سـود القلوبـي
والحقيقـه مانـقـول إلا الحقيـقـه
خل ذاك الحساوي عايشٍ في حسـاه
منت حصني لكـن الزهـر قلدتهـا
موضوع: عـبــدالله بـــن شــايــق..فـيــصــل الــريــاحــي 
الأحد أغسطس 29, 2010 1:45 pm
